Profile photo of wegneuk

by wegneuk

Ek trek..WEG!!

December 8, 2014 in Uncategorized

Hierdie platform is net te vol foutboodskappe en min spasie.,ek skryf verder op http://weghardloop.blogspot.com/

Profile photo of wegneuk

by wegneuk

Baviaans met motorfiets

October 30, 2014 in Uncategorized

eenBB was by haar Biologiese pa vir ‘n naweek toe ek en G4 besluit om Baviaans toe te gaan met sy nuwe Yamaha XT 660.  Ons het nog geen panniers vir die bike nie en moes alles op die bike vasmaak of op my rug.  Dit was ‘n groot fout!  Mens kan nie glo hoe ‘n klein rugsakkie na 100km agterop ‘n bike in jou rug insny nie.  Ons het laatmiddag uit Kleinbrak vertrek en die Outeniekwa pas oorgery in perfekte weer.  Ons laaste stop was Uniondale voor ons die afdraai Baviaans toe geneem het.  Ek het al vroeer by Woolworhs in George gestop en fudge, beskuit en klein kasies in my baadjie weggepak.  Nou het ons vleis vir G4, kondensmelk en koeldrank in die rugsak ingewurg.

veertien dertien twaalf

Ons het amper dadelik na die afdraai  vanaf Uiniondale Baviaans toe reuse bergskilpaaie teegekom.  ‘n Ent verder het ons  buffels met ‘n kleintjie gekry.  Die ma was baie beskemend teenoor die outjie.  Op hierdie stadium was ek al bitter, bitter seer.  Die sak het in my skouers ingesny en my sitvlak was morsdood deurgesit.  Dit het gevoel of die pad nooit einde gaan kry nie.  Ek het begin om elke klip te voel waaroor ons ry.  Ons het ook spoedig begin om water oor te steek.  Nou was ek baie seer, en sopnat met koue voete.  Ek het saggies begin huil want die trip was vir my aaklig.  Ons het by ‘n plekkie gery wat ek gedink het ons oornag plek was, maar was meegedeel ons plek is nog 20km verder.  Dit was die langste 20km van my lewe.  Nie eers die baie oulike donkies langs die pad kon my opbeur nie.  Ons was nog seker drie keer deur water en het sopnat, yskoud en bitter moeg by ons slaapplek opgedaag.  Nie eers na’n dag op ‘n perd was ek al so seer nie.  Daar was vleis gelos vir G4 maar daar was geen brood of kos vir my nie.  Ek was nogals teleurgestel in G4 hieroor.  Hy het alles gereel en voel hy kon darem net  ietsie vir my gereel het.

elf tien nege

Ek was baie bly dat ek in Woolworths beskuit en kaas gekry het.  Die verblyf was in ‘n hut met 2 beddens en ‘n warm stort en het het uitgekyk oor ‘n dam.  Die enigste slegte ding was dat die voetpaadjie verby die ander hut gekronkel het.  Mens moes op hulle stoep loop as mens erens wil gaan stap wat baie ongemaklik was en mens amper effens gevange gehou het in jou eie hut.  Ons hut het elektrisiteit gehad, maar geen ketel nie.  Ek het ‘n lang (en vir G4 ‘n baie onverstaanbare!) verhouding met tee.  Om sonder ‘n ketel te wees is soos om sonder water te wees vir baie mense.  Dit is nie ‘n luukse vir my nie maar eerder ‘n noodsaaklikheid.  Ek moes water in ‘n pot op die stofie kook wat werklik ‘n vermorsing van elektrisiteit is.

twee vyf drie

Ek was baie moeg, seer en oor die algemeen bietjie af, ons het vroeg gaan slaap.  Gelukkig het ek die volgende dag beter gevoel.  Ons het ‘n ent gaan ry en 3 kindertjies met “shop” bordjies langs die pad gekry.  Ons het daar gaan inloer en was die nuwe plekkie se eerste kliente.  Die kindertjies het saamgeloop.  Ons moes weer deur water en was (alweer) sopnat.  Ek was teen die tyd al baie honger, so die geroosterde broodjies was heerlik met tee.  Ek het ‘n choc chip koekie ook gekry en het dadelik weer krag vir die volgende natword sessie gekry!    Ons het verby Zaaimanshoek gery en wonderlike mooi husies gesien.  Ons het begin wonder oor petrol en begin rondvra daaroor.  Ons is meegedeel dat daar dalk petrol by Kleinpoort Algemene handelaar sal wees.  Die winkel was egter alreeds toe en ons het besluit om eers die volgende oggend verder daaroor bekommerd te wees.

Ons het die aand met mede kampeerders gesels wat van Denemarke af kom en jaarliks vir maande deur Suid Afrika kom toer met ‘n baie goeie toegeruste 4×4 met ‘n lekker daktent.  Ek het gewens ons was eerder hulle!!  Dit is ‘n groot droom om deur Afrika te reis met ‘n 4×4!  Aan die begin van ons vriendskap het G4 die droom gedeel maar ek kon sien dit was bloot deel van die witleuntjies wat baie mense so maklik vir mekaar vertel aan die begin van ‘n vriendskap.

Ons het die volgende oggend vertrek en die soektog na petrol het begin.  Ons het uiteindelik die tannie by Kleinpoort oortuig om vir ons oop te sluit.  Ek het saam met haar gestap en G4 het op die motorfiets gevolg.  Haar hond het ‘n stewige hap uit sy been probeer gryp, gelukkig het die stewels hom beskerm!  Sy het vir ons van haar grassnyer se petrol gegee.  Die winketjie is ook die poskantoor en daar is ‘n hele rak vol Lennon medisyne!  Die plan was om nou deur na Patensie toe te ry.  Tot op die stadium was die Baviaans nie vir my so vreeslik watwonders nie en beslis nie die pyn en koue , nat bene en voete werd nie.

Ons het by die Natuurreserwe se hek gestop en die ingangsfooie betaal.  Al wat ek kan sê van die pad hiervandaan is “WOW”!  Dit is ‘n wondermooi stukkie pad.  Daar was bobbejane, vreemde bokke met lang horings en kleurvolle likkewane langs die pad.  Die vegetasie is mooi en die rit was onbeskryflik.  Daar is hope los klippe en soms het ons gewonder of ons ooit op die pad is.  By Smitskraal het ons besluit dat ek eerder sal deurloop en ‘n foto sal neem.  Dt was baie snaaks.  Ek het tot om en by die middel geloop deur kniehoogte water, toe G4 begin oorsteek het.  Reg langs my tref hy ‘n klip en hy val om met fiets en al.  Ek het vinnig die XT van hom afgetrek.  Gelukkig het dit dadelik weer gevat.  Die natuur was hierna steeds  baie, baie mooi.  Wolke het egter saamgedrom en spoedig het dit gestort reen.  Die mooi tonele het egter opgemaak vir die ongerief.

ses sewe

Ons het net buite Patensie by Padlangs gestop om iets te eet, my eerste warm ete in dae!

Van hier is ons deur Hankey en toe op die R330 deur Humansdorp toe.  Hier het ons vir ‘n rukkie op die N2 gery en die R62 Kareedouw toe geneem.  Ons moes hier by by Pep stop vir warm sokkies.  Ek kon later nie meer my bene of arms voel nie.  Gelukkig was die sak ligter en my skouers nie meer so seer nie.  Die teerpad het ook gehelp vir my arme sitvlak. Hierdie kant van die R62 is baie mooi en neem mens deur baie vrugteboorde.  Dit was veral mooi in die stormwolke wat ons maar bly agtervolg het.   Buite Uniondale het ons  gestop om vol te maak en ek was oorstelp om warm sjokolade daar te kon kry.  Die hele plek was vol plaaswerkers wat inkopies kom doen het.  Daar het ‘n heerlike, vrolike atmosfeer geheers.  Ons het ook ‘n boer met ‘n vrag fynbos oppad lughawe toe gekry.  Ongelooflik om te dink ons blomme vertrek oorsee!  Dit het weer gestortreen oor die Outeniekwa berge maar gelukkig was huis nie meer ver nie.  Lanklaas was ‘n warm bad so salig en heerlik!

twenty

Profile photo of wegneuk

by wegneuk

Dag 5, Matjiesfontein

December 15, 2013 in Uncategorized

Ons het uit Sutherland vertrek terug huis op die R354 en het besluit om by Matjiesfontein aan te gaan.  Wat ‘n slim besluit was dit nie!  Die Lord Milner hotel staan trots in die fel Karoo son met werknemers wat ongelooflik innemend is.

Johnny is natuurlik ‘n aantrekkings krag groter as die hotel self!  Hy sing, maak stemme na en vertel spookstories, die dorpie is ‘n besoek werd net om vir hom te ontmoet!  Hy het my tot sover gekry om saam met hom te sing!

Ons het ook ietsie daar geeet en die kos was heerlik.  BB was net die hele tyd lugtig vir die spook waarvan Johnny ons vertel het!

Die dorpie is regtig pragtig en ek sal dolgraag wil terugkeer en in die hotel, saam met die spook, wil oornag..

Ons is van Matjiesfontain na Laingsburg waar ons weereens verstom was oor die hoogte van die destydse vloed.  Hiervandaan is ons op pragtige plaaspaaie Ladismith toe en so terug huis toe.

Profile photo of wegneuk

by wegneuk

Dag 4, oornag by Sutherland

August 15, 2013 in Uncategorized

Welkom in Sutherland!

R355 na Sutherland

Sutherland was vir my wondermooi.  Dit is ook die geboortedorp van my gunsteling gedig se skrywer.  “Grense” deur NP van Wyk Louw verwoord vir my so baie van wat ek voel.  Dit was sielsverrykend om voor sy  en sy broer, W.E.G. se huis te kon staan.

Louw huis

 

Pragtige huisie

 

Sutherland is net ongelukkig baie duur wat akkommodasie aan betref.  Gelukkig het ons baie gawe mense gekry wat ons gehelp het om iets te kry wat ons kon bekostig.  Middagete was by die Jupiter, maar die kos was nie vir my baie lekker nie, smaaklose botterskorsie sop was al wat hierdie vleislose mens kon bestel.

 

Kontak nommers

Ons het die aand bespreek vir ‘n astrologiese toer by Jurg van Sterland.  Dit was ongelooflik, tot BB het die besoek baie geniet.  Hy het verskeie reuse teleskope waardeur mens na die sterre kan kyk.  Meer daaroor hier:  Dit was net ysig koud, en dit in Desember!

G4 was taamlik suur oor die akkommodasie se prys, so ek was te bang om te vra of ons kon gaan eet, so het die aand beskuit en tee gehad om die hongerpyne te stil. Daar was heelparty eetplekkies en ek wonder hoe hulle kos sou gesmaak het.  Die een plekkie het heerlike koekies verkoop.

Stofstraat

Nog ‘n oulike huis

 

Winkel met heerlike koekies!

Observatory

Pasop!

Interessante deur

Kerk

 

 

 

 

 

Ons het die oggend vir ‘n laaste keer deur die dorp gestap en arme BB het haar gunsteling teddiebeertjie verloor.  Ons is taamlik hartseer daar weg terug huis toe.

Profile photo of wegneuk

by wegneuk

Dag 3

August 13, 2013 in Uncategorized

Ons het op die R362 gery en die eerste afdraai was Ebenaeser.  Dit is ‘n familienaam en ek wou graag sien hoe die dorpie lyk.  Daar is nie veel behalwe vir ‘n kerk nie.. Die kerk is egter pragtig en goed versorg. Daar is egter heel party ander geboue wat jammerlik besig is om uit mekaar te val. Die mense is egter baie vriendelik.

Ons het ook ‘n seuntjie sien golf speel, en hom later weer op die Lutzville golfbaan gesien!  Dink ons het dalk nog ‘n Louis Oosthuisen oppad..

Ons eerste stop hierna was Lutzville se wynplaas.  Wat mens ookal doen, moet nie eiers bestel vir ontbyt nie!  Ek het die slegste eier van my lewe hier gekry, rubberagtig taai gebak en totaal en al oneetbaar.  Die wyn was egter heerlik en ons het ‘n paar bottels gekoop.

Van hier is ons verby ‘n vloed en toe op die R363 Nuwerus toe, maar het eers by Koekenaap verby gery.  Ek weet nie wie Snoepiee in Die Burger gelees het nie, maar hy het altyd gepraat van Koekenaap.  Dink nie daar is veel om te doen anders as om op jou hok te le en dut nie!!  Nuwerus is nogal ‘n oulike dorpie met pragtige kokerbome.  Vanaf Nuwerus is ons op die N7 Garies toe.  Garies, ‘n dorpie met geen biltong nie maar wel ‘n Chinese winkel..Kan nie verstaan dat hulle so toegelaat word om orals oor te neem nie. Na die teleurstelling van Garies is ons deur die Studer’s pas op die R355 Platbakkies toe.  Die wereld is pragtig, stil en onverstoord.  Ons het dikwels gestop, veld in geloop en pragfotos van kokerbome en bossies geneem. Vanaf Platbakkies is ons deur Alwynsfontein en Kliprand om by die R357 aan te sluit.  Van hier het ons geswaai Nieuwoudtville toe en aangehou op die R27 om by Calvinia te oornag.  Ons het effens gesukkel met akkommodasie maar ‘n voetganger het ons verwys na ‘n gastehuis waar ons het ‘n lieflike huis vir onsself gehad!

Met die uitpak slag moes ons egter uitvind baie van die wyn het stukkend gebreek op die grondpad!  Alles gaan dus nie altyd reg in ‘n seker maak voertuig nie…ek verkies maar ‘n Nissan se sagte suspensie.  Ons het gaan eet by .n funksie plekkie, Mile 250 Waterfront restaurant met GROOT porsies.  Tot BB het gesmul aan haar spaghetti bolognaise.  Vroegoggend het ons bietjie deur die dorp gestap, die museum besoek waar ons die nuwe kurator ontmoet het en fotos geneem het.  Dit als  terwyl die lieflike Hantam berg ons die hele tyd in die oog hou.  Ons het toe die R354 Sutherland, verby Middelpos toe geneem.

Profile photo of wegneuk

by wegneuk

Dag 2 Weskus 2012

March 30, 2013 in Uncategorized

Elandsbaai bestaan uit ‘n Wes en ‘n Oos dorp..

Bobbejaan punt

Die Sishen Saldanha spoorlyn loop vlak langs die baai verby en BB het haar verkyk aan die lang trein.  Daar is ‘n klein hawe met allerlei klein bont bote.

 

Elandsbaai se hawe

Daar was ‘n paar onvriendelike surfers op die strand.  Ek sê dit tong in kies, ons het rigting gevra na die hawe, en een van hulle het haar vreeslik vererg toe G4 aanwysings vra en toe blykbaar nie na haar bly kyk het nie maar na iemand anders.  Ons het maar net onderlangs gelag en aangery.

Die Oos kant was aansienlik vriendeliker en ons het aanwysings na die tolpad gekry.  Die diens by die pad was net so flink en vriendelik.  Ons het toe op die lang grondpad gery tot by  Lambertsbaai.  Oppad is ons ook verby die bekende seekos restaurant Muisbos skerm.  Dit was oorvol en aangesien ek nou nie juis ‘n “member” van seekos is nie, het ons besluit dit is beslis nie die prys werd  vir iemand wat net die snoek en potbrood sal eet nie!    Ons het uiteindelik by Isabellas by Lambersbaai gaan eet.  Die kos was heerlik.

Isabella restaurant te Lamvertsbaai

Wat interessant is van Lambertsbaai is dat daar ‘n groot aartappel fabriek op die hawe is!  Yip, nie ‘n vis fabriek nie, maar ‘n aartappel fabriek.

Isabellas vir heerlike kos!

Die voel uitkyk plek is ongelukkig nie meer gratis soos in my studente dae nie, en ons het besluit dit sou te duur vir ons al drie wees om soontoe te gaan.  Ons het maar ‘n paar fotos van die hawe geneem.  Kortom, Lambertsbaai  is pragtig, vol vriendelike mense en heerlike kos!

Lambertsbaai se hawe

Van Lambertsbaai is ons weer via die tolpad Doornbaai toe.

Kleurvol by Doornbaai

Skulpe by Doornbaai

Meer pragtige bote by Doornbaai

Ons kon nie enige akkommodasie kry nie en is toe deur Strandfontein toe.  Daar het ons by die Karavaan park ‘n selfsorg husie bespreek.  Dit was R600 per nag vir ‘n huisie.  Anders as by Dwarskersbos se verblyf was hier niks ekstra ingesluit nie.  Daar was darem beddegoed maar dit was werklik al.  Daar is ook net een klein kafeetjie op Strandfontein maar hulle het niks brood of vleis gehad nie.  Aandete was dus beskuit en tee.  Ek het ook nog ‘n pasteitjie vir BB gehad.

Sy het heerlik gebly en die aand die trappies na ons slaapplek met doring besaai en die volgende oggend ewe sedig gevra of ons nie in ietsie getrap het nie!

Die mense by die kafee was baie vriendelik, maar by die karavaan park, geensins nie.  Ons het daar gevra oor al die mosselskulpe op die strand, en is meegedeel die mossels verloor sy skulp soos hy groei!  Dit is natuurlik glad nie waar nie.   Die blou mossel is oorspronklik van die Mediterene, die Mytilus galloprovincialis wat sy pad Weskus toe gemaak het deur aan skepe vas te sit wat olie by Saldanha op en aflaai.  Ons moes ook ‘n deposito van R400 betaal wat weer in ons rekening terugbetaal sou word.  Ons het die geld eers maande later terug ontvang.

Holrivier monding

Ons het ook na die monding van die Holrivier gery.  Mens sal maklik hier kan vassit en ek wonder hoe lank voordat hulp sal opdaag!

Getypoel by Strandfontein

Die volgende oggend was die hele Strandfontein toe onder die mis.  BB het dit goed opgesom toe sy die see in hardloop en aankondig dat dit vrieskas koud is!

Ons is maar vroeg weg en het besluit om binneland toe te swaai aangesien die kus so koud was.

Profile photo of wegneuk

by wegneuk

Weskus 2012 (via Sutherland)

January 3, 2013 in Uncategorized

Ons vertrek vanaf Kleinbrak op die N2 tot by Heidelberg.  Heidelberg is een van die dorpies wat mens geneig is om vinnig deur te jaag oppad Kaap of Mosselbaai toe.  Dit is egter vir my ‘n pragtige dorpie.  Ek stop graag by die “Blue Crane Farmshop” padstal langs die N2.  Hulle fyngebak en etes is heerlik en waar moontlik is alles plaaslik.

Ons het egter nie die keer daar gestop nie maar regs gehou op die R322.  Dit was alreeds laatmiddag op ‘n Saterdag en van die winkeltjies was alreeds gesluit.  Die name was, wel, beskrywend..

 

Sowat 27km verder is ons deur die Tradouwspas.  Dit is prentjie mooi met baie stopplekke en beslis ‘n plekkie wat mens op ‘n warm somersdag wil besoek om in een van die talle poele af te koel.  Fotos slaag nie daarin om die pragskoon vas te vang nie.

Tradouws pas

Ons het by een van die uitkykpunte gestop en tog ‘n paar fotos geneem.  Daar is op party plekke watervalle en verskeie stroomversnellings wat opmekaar volg met pragtige, groot poele tussen in.  Ons moes hard keer om BB in die voertuig te hou, sy wou net gaan swem!

Tradouw pas

Ons het by Barrydale by die Country Pumpkin gestop vir middagete.

The Country Pumpkin

Deel van die versierings is ou spyskaarte van die Spur.  Mens kan skaars glo dat kos so goedkoop was..kyk bietjie na die foto!  Let op die Lam tjoppies (nogal 400g) wat maar R14.75 gekos het!

Ou Spur spyskaart

Ons het het ook by die “memories of Africa” ingeloer.  Een van die vertrekke se reuk het my binnegetrek, naeltjies, kaneel en ander geure vul die lug.  Dit is tradisionele Duitse gebak deur ‘n plaaslike inwoner.  Ek het dadelik van dit gekoop en was glad nie teleurgesteldt nie, die smaak is eg Duits.  Ek is net spyt ek het nie meer gekoop nie!

Barrydale

Daar is baie interessante huise op Barrydale, tot ‘n halwe motor staan op een werf!

Barrydale

Barrydale

 

Vandaar is ons met die R62 na Montagu.  Ons het nie daar gestop nie, maar gehou deur Arniston, Robertson en deur Worcester.  Daar het ons die R43 geneem en toe links gedraai op die R301.  Hier het ons Bain’s Kloof pas geklim.  Orals was motors met mense wat in poele water afgekoel het.  Al wat hier gepla het is die aantal fietsryers met “backup” motors wat dink die hele pad behoort aan hulle.  Aan die einde van die Kloof het ons ‘n groot trop bobbejane teegekom.  Een het hom min aan ons gesteur en heerlik op ‘n tafel ontspan.

Bainskloof

Ons het hom ‘n geruime tyd sit en dophou, (wel, tot die fietsryers nader gekom het).  BB was minder beindruk, sy haat bobbejane.  (nog oorgehou van Gamkaskloof toe hulle die plek vreeslik bemors het) Wellington was snik warm.  Ek wou graag n kortbroek koop, maar al wat oop was, was ‘n Chinese winkel.  Dit is werklik kommerwekkend dat hulle so oorneem en mens so moet sukkel om goeie plaaslike produkte in die kleiner plekkies te kan koop.  Ons is vandaar op die R44 na Riebeek-Kasteel en Riebeek Wes toe.  Daar was troue op troue by elke moontlike kerkie en restaurant!  Ons het by Riebeek_Kasteel by ‘n pragtige plek gestop vir iets om te drink.  Die tuin is boomryk en laat mens dink aan ‘n sprokiesverhaal.

Ons het voorgegaan op die R311 en later regs gedraai op die N7.  Na sowat 30km het ons links gedraai op die R399 na Velddrif.

Dit is moeilik om tussen Velddrif en Laaiplek te onderskei.  Ons het dit so teen skemer bereik en na slaapplek naby die see begin soek.  Dit was baie moeiliker om te kry as wat ons gedink het!  Ten einde raad is ons Dwarskersbos toe.  Daar het ons eers by die karavaan park gestop, maar dit was reeds toe en niemand het die na ure telefoon nommer beantwoord nie.  Ten einde raad is ons toe weer terug Verlddrif toe.

Gelukkig sien ek toe ‘n klein pyltjie wat wys na akkommodasie terwyl ons nog in Dwarskersbos was.  Ai, so ontmoet ons toe die ongelooflike gasvrye C Shell Cottage.

C Shell Cottage, Dwarskersbos

Hulle het mense gehad wat vroeer vertrek het en kon ons dus help met slaapplek.  Terwyl hulle gou vir ons reggemaak het, is ons toe tog terug Velddrif toe vir iets om te eet.  Almal beveel die hotel aan maar G4 weier toe om by ‘n hotel te stop vir kos.  Ons het toe maar besluit  om iets by Spar te koop.  Ons was net betyds terug by Dwarskersbos om die laaste strale van die son te vang.

Dwarskersbos

Dwarskersbos

Die akkommodasie was fantasties.  Die plekkie was ten volle gemeubileerd met beddegoed, handdoek seep ens, daar was tot suiker, tee en koffie.

Die volgende dag vind ek uit dat die eienaars  nie net my pa geken het nie, maar ook sy boek besit en hom al persoonlik ontmoet het.  Hy het my die netjiesste katrol en visstok versameling gewys wat ek al ooit gesien het!!  Ons het heerlik gesels en ek het sy boek namens my pa onderteken.

Ons het vroegoggend langs die see gaan stap.  Mensig, maar die Weskus se seelug is koud, bitter, bitter koud!  Ek kon later nie meer my bene voel nie!!  Ons was stomgeslaan deur die lewe, en teselftertyd gebrek aan lewe, langs die kus, as dit sin maak..  Daar was baie robbe, maar baie van hulle het siek voorgekom.  Daar was ook baie sonvisse wat uitgespoel het.

Sonvis

Darskersbos

Die koue en wind was net vir my baie erg.  Lyk egter nie of BB en G4 dit gevoel het nie!  Dit het vir my gevoel of ons nooit weer by die gastehuis sal uitkom nie!!  Ek het dadelik gaan stort en warm aangetrek.

Na ‘n vinnige tee en besluit vertrek ons toe met dag 2 na Elandsbaai.

Profile photo of wegneuk

by wegneuk

Weskus blomme

October 4, 2012 in Uncategorized

Sal ongelukkig nie kan kommentaar lewer oor verblyf nie, want ons het by familie oorgebly.

Die blomme was vanjaar so mooi.  Ons het van Kaapstad al langs die R27 gery tot by die Weskus Natuureservaat deur na Postberg toe.  Moet net byvoeg, diens by die Natuurreservaat is flink en uiters vriendelik.  Ai, maak mens trots Suid Afrikaans!!

Oppad het ons by Ganzekraal gestop wat nogal na ‘n oulike oornag/vakansie plek lyk met billike tariewe.

Ek wou graag kommentaar lewer op die fotos, maar weet nie hoe nie en het nie nou tyd om daarmee te sukkel nie.

Ons het die heerlikse snoek viskoekies by ‘n eetplekkie in Darling geeet, die Marmelade Cat.  Ons het Darling, Malmesbury deur terug Worcester toe gery.

Profile photo of wegneuk

by wegneuk

Verward

September 22, 2012 in Uncategorized

Was , wel, WEG vir ‘n rukkie en vind die nuwe platform effens verwarrend..

Ek laai sommer 2 onlangse fotos op, geneem te Grootbrak.

Profile photo of wegneuk

by wegneuk

Op die plaas kamp, Seweweekspoort

March 23, 2012 in Uncategorized

Dit is seker hoogtyd dat ons skryf van BB se gunsteling kampplek!


Haar plekkie is by Seweweekspoort, spesifiek by Op-die-plaas-kamp (www.seweweekspoort.co.za).

BB het rooi hare, en dit verduidelik dus dat haar gunsteling kat ‘n gemmer katjie is.  Sy was in de wolke toe daar ‘n gemmerkat met ‘n klomp klein gemmer katjies op die plaas is.!


Die kampplek is heerlik stil, ons het ‘n video geneem in die donker, en ek luister nog gereeld na die naggeluide.

Daar is ‘n keuse van sagte gras, in die son, of koelte op harde grond!  Daar is ook ‘n karavaan vanwaar hulle noodsaaklikhede soos brood en melk verkoop vir die plaaswerkers en kampeerders. Warm water word deur ‘n donkie voorsien.  Daar is aangename stort en badgeriewe.

Die kampgebied is naby ‘n dam wat vir wonderlike weerkaatsings sorg as die son sak.  


Ek is seker die maan is nader aan Seweweeksport as enige ander plek op aarde.  Dit voel of mens net effens kan uitrek en dan aan die maan kan raak.


Dit is ‘n werkende plaas, en ‘n paradys vir kinders met perde, skaaphonde, varke, ganse, skape en natuurlik katte.

Daar is ook baie kleiner insekte, baie skoenlappers, naaldekokers en dan natuurlik hul vyande, paddas.  Dit was heerlik om saam met BB op die gras rond te kruip op soek na die kleiner diersoorte.  G4 het selfs op miskruiers afgekom wat ons vir ‘n ruk 

lank dopgehou het.

 Eg in sy sagte natuur het hy hulle gehelp om die nuutgeskraapte pad oor te steek!!


Die Gamkapoort dam is ‘n interessante rit van sowat 21km op die Bosluiskloof pas om te onderneem.  

Dit is ‘n wondermooi pas, maar pasop vir al die fietsryers!  Die dam is net vol muskiete maar ons kon darem ‘n plekkie sonder gras kry wat relatief muskiet vry was.

Daar is ‘n “honesty shop” naby die dam waar ons heerlike yskoue koeldrank kon koop.

Orals omvou die berge ‘n mens en laat jou skoon nietig voel.

Dit was ‘n wonderlike naweek sonder bobbejane, wat nog ‘n pluspunt vir BB is.  Sy hou maar net niks van bobbejane nie, dink dit is te veel kompetisie as dit by soetgoed kom!


As mens kinders het, is mens geneig om die plekke te bespreek wat vermaak vir kinders aanbied.  Waterwurms, verhitte swembaddens, wipmatte ens.  Soms soek ‘n kind net onverdeelde aandag, en is dolgelukkig om agter miskruiers en goggas aan te kruip!

Ons sal beslis weer gaan!
PS.Die eienaars kan ook etes voorsien as jy vooruit bespreek en dit is ‘n ideale plekkie om dalk ‘n spesiale geleentheid te vier.