Avatar of De Waal

by

Tranströmer se kodeks

2012/12/08 in Uncategorized

Grafika deur De Waal Venter

Uit: Det vilda torget 1083
IV

CODEX

Fotnoternas män, inte rubrikernas. Jag befinner mig i den djupa korridoren …
Kodeks

Tomas Tranströmer

Voetnota-manne, nie hoofopskrifte nie. Ek bevind myself in die diep gang
wat donker sou gewees het
as my regterhand nie geskyn het soos ‘n flitslig nie.
Die lig val op iets geskryf teen die muur
en ek sien dit
soos ‘n duiker die naam op die gesonke romp sien naderflikker in die stromende     diepte:
ADAM ILEBORGH 1448. Wie?
Hy wat die orrel sy lomp vlerke laat uitstrek en laat opstyg het –
en dit het amper ‘n minuut swewend gebly.
Wat ‘n geslaagde eksperiment!
Op die muur geskryf: MAYONE, DAUTHENDEY, KAMINSKI … die lig val op die een naam na     die ander.
Die mure is volgeskryf.
Dit is die amper uitgewiste name van kunstenaars
voetnota-manne, die ongespeelde, die halfvergete, die onsterflike onbekendes.
Vir ‘n oomblik voel dit of hulle almal hulle name tegelyk fluister –
fluistering op fluistering tot ‘n brekende golf deur die gang stort
maar niemand platslaan nie.
Dis tussen hakies nie meer ‘n gang nie.
Nóg ‘n begraafplaas nóg ‘n markplein maar iets van albei.
Dit is ook soos ‘n kweekhuis.
Baie suurstof hier.
Die voetnotas se dooies kan diep asemhaal, hulle bly in die vorige ekosisteem.
Maar daar is baie wat hulle ontvlug!
Hulle word gespaar om die moraliteit van mag te sluk,
hulle word die swart-en-wit blokkiespel gespaar waar die stank van lyke die enigste ding is     wat nooit doodgaan nie.
Hulle is gerehabiliteer.
En dié wat nie meer kan vat nie
het nie ophou gee nie.
Hulle het die stralende en swaarmoedige tapisserie deels uitgerol
en later weer gelos.
Party is naamloos, hulle is my vriende
maar ek ken hulle nie, hulle is soos daardie klipmense
uitgekerf op grafstene in ou kerke.
Sagte en streng reliëwe in mure waarteen ons skuur, figure en name
versonke in die klipvloere, op pad na uitwissing.
Maar dié wat werklik van die lys geskrap wil word …
hulle bly nie in die voetnotas se omgewing nie,
hulle loop af in die dalende baan wat eindig in vergetelheid en vrede.
Volkome vergetelheid. Dit is ‘n soort eksamen wat afgelê word in stilte:
om oor die grens te gaan sonder dat enigiemand dit merk …

 
Uit Sweeds vertaal deur De Waal Venter

Nota: (deur Tranströmer)
Kodeks = manuskrip. Ileborgh en Mayone is ou orrelmeesters, Kaminsky – ‘n Duitse, negentiende eeuse komponis. Dauthendy – ‘n Duitse skrywer, oorlede 1918

Tomas Tranströmer

Add Comment Register



Leave a reply

Your email address will not be published.


*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>