Op die seepkis

Is Suid-Afrika vandeesweek deur ‘n Vreemde Vlieënde Voorwerp besoek? Het (nóg?) ‘n paar van ons free-range koeie, en dalk ‘n free-range plattelander of twee, nou wetenskaplike eksperimente geword?

Juri wonder, want gerugte het vroeër vandeesweek die ronde gedoen van ‘n VVV wat vreemde ligpatrone oor Suid-Afrikaanse lugspasie kom verf het.

‘n News24-leser het egter die gerugte gesmoor met ‘n mooi verduidelikende galery. Blykbaar was die VVV toe al die tyd ‘n Amerikaanse ruimtetuig was brandstof vrygelaat het daar bo tussen die sterre.

Maar nou wonder Juri; wat as DIT nou weer ‘n toesmeerdery is om die feit dat daar wél die naweek ruimtewesens in ons midde was, te verberg?

Hmmmmm.

Kyk, hier gaan Juri homself nog ryk maak. Stinkryk. Ryker as Nathi Mthethwa EN Trevor Manuel. Nee wag. Dis dalk effe hoog mik, want terwyl ek op my salaris moet staatmaak, het hierdie ouens die belastinggeld van die ganse land tot hul beskikking vir hulle weelderig bestaan.

Maar ek hou koers. Ek wed vandag weer Zuma gaan niks sê oor Trevor se splinternuwe tjor nie. Ek het nou so baie vertroue dat ek gaan wen, ek’s gaan R20 daarop sit.

As ek so aanhou wen,blaas ek ook een van die dae R250 000 op ‘n hotel en ‘n koel miljoen op ‘n kar.

Vorige weddenskap:

Ek het R10 hier in my gatsak wat sê pres. Jacob Zuma gaan niks doen of sê oor Nathi Mthethwa se R250 000 hotelrekening nie.

Hoe lyk dit? Gaan ek wen?

Juri onthou die dae toe hy nog in die mall kon rook. Toe hy kon window shop en rustig teug terwyl hy van winkel na winkel drentel.

Toe begin rookwette die strop al nouer trek, tot waar ons nou sit. Jy kan dan nie eens meer BUITE ‘n restaurant op die deck sit en ‘n sigaret geniet nie.

Nou kyk, ek het self ‘n jaar gelede my rookgewoonte opgegee, maar ek het nog nooit deel geword van die heksejag teen rokers nie. Ek dink nou maar eenmaal net nie dis die wêreld se grootste sonde nie.

Maar toe sien ek dié berig oor ‘n vierjarige, ja vier jaar oue seuntjie in China wat ‘n kettingroker is. Volgens sy dokter lyk dit asof hy op die ouderdom van twee al begin rook het.

En skielik trap my teorieë water, want jy weet mos, monkey see, monkey do.

‘n Tweejarige leer nie op sy eie hoe om homself kanker te gee nie. Baba’s word nie gebore en dink “sjoe, nou verdien ek ‘n sigaret nie.”

Hulle sien – elke dag – wat grootmense doen, en as die grootmense rondom hulle elke dag rook, nou ja, die res is mediese geskiedenis.

En nou wonder ek ewe skielik. Ek met my liberale uitkyk op free choice en hou op teem oor mense se klein plesiertjies.

Het dit nie werklik tyd geword om sigarette finaal uit te wys vir die sosiale euwel wat dit is nie?

Is dit nie nou tyd om rokers, hul slegte gewoonte en sommer al hulle stokkies op die brandstapel te sit nie?

Heelparty medici reken sigarette is net so, of meer verslawend as heroïne.

Sal jy toelaat dat jou kleuterkind kyk hoe ‘n junkie ‘n naald in sy arm druk? So hoe kan jy dan toelaat dat hy kyk hoe iemand ‘n sigaret aansteek?